BAGUIO CITY – Inrikep ti John Hay Management Corporation (JHMC) ti nalatak ken madaydayo a Camp John Hay Eco-Trails kalpasan a nadiskobre iti deppaar dagiti trails dagiti nagkaiwara a basura ken graffiti kadagiti mula.

Iti paka-ammo ti korporasyon, naiwara iti trails dagiti basura kas iti nag-inoman ti danum, bungon dagiti taraon, nag-upusan ti sigarilyo, wet wipes ken uray pay diapers.

Nailanad nga adda metlaeng dagiti nagsurat kadagiti bulong dagiti mula kadagiti trails.

-- Advertisement --

Gapu iti daytoy, nainget a konkondinaren ti JHMC ti kina-iresponsable dagiti nagaramid kadagiti nasao a banag ken ti panangbaybay-an dagitoy iti nakaparsuaan.

Nagdesisyon ti korporasyon nga irikep iti saan a masinunuo a kaatiddog ti panawen dagiti trails iti Camp John Hay tapnu agdalusda ken agrekober dagiti mula ken animal.

Kalpasanna ket maisayangakt ti panagadal no mabalin a mailukat manen iti publiko dagiti trails.

Nupay kasta, imballaag ti JHMC a permanente a mairikep dagiti trails iti kanito a maobserbaran manen ti panangbaybay-an ken kina-iresponsable dagiti agturong sadiay.