BAGUIO CITY – Manamnama nga inton December 15 ket mailukat iti publiko ti maar-aramid nga eco-friendly fitness trail a masarakan iti Pine Trees of the World Park iti likodan ti swimming pool ti Athletic Bowl ditoy siudad ti Baguio.

Iti panakiyuman ti Bombo Radyo Baguio, kinuna ni City Recreation and Welfare Service Officer Christian Villareal nga 80% a nakompleton ti proyekto.

-- Advertisement --

Innayonna a manarimaanen ti panangisimpada kadagiti kaykayo a fitness equipment tapnu maimuntaren iti naaramid a trail nga agatiddog iti agarup nasurok tallo a kilometro.

Tampok iti eco-friendly fitness trail ti nagduduma nga istasyon ken disenyo wenno trail course para kadagiti ubing, senior citizens ken regular ages malaksid pay kadagiti intermediate courses para iti panagsanay dagiti atleta ken dagiti panakabagi ti linteg.

Inlawlawag pay ni Villareal a ti proyekto ket paset ti kampanyada tapnu maital-o ti mental awareness and wellness nangruna ita a nabayag a napupuk dagiti tattao gapu iti pandemya.