BAGUIO CITY – Natiliw ti dua kadagiti Regional Top Ten Illegal Drug Personalities ti Cordillera Region iti buy-bust operation nga insayangkat dagiti otoridad sadiay Upper Session Road, Military Cut-off Barangay, Baguio City idi agsapa.

Nabigbig dagitoy a da Aprilyn Eyas Agoyos, 30-anyos, residente ti Dizon Subdivision, Baguio City ken Justine Cortez, 23-anyos, residente ti Tabora Street, Baguio City, agpada a high value individuals.

-- Advertisement --

Inlako ni Agoyos iti nakatransaksionda nga operatiba ti maysa a pakete ti maatap a shabu nga agdagsen ti mapattapatta a lima a gramo ken aggatad ti P34,000.

Nakumpiskar pay kenkuana ti kanayonan a dua a pakete ti maatap a shabu nga agdagsen ti mapattapatta a 10 a gramo nga aggatad ti P68,000.

Nakumpiskar met kenni Cortez ti maysa a pakete ti maatap a shabu nga agdagsen ti mapattapatta a dua a gramo nga aggatad ti P13,600.

Narekober manipud kadagiti suspek ti naaramat a buy-bust money ken nakumpiskar ti inaramatda a cellphone ken pickup truck.

Kinuna dagiti otoridad a ni Agoyos ket maysa a drug surrenderee ti BCPO-Station 7 idi July 2016.

Naamuan pay a ni Agoyos ti babai iti video footage a nag-viral gapu iti panang-kidnap ditoy ti maysa a lugan idi parbangon ti May 6 ti agdama a tawen.

Nupay kasta, naduktalan a ti napasamak ket ‘kidnap me scheme’ a ti utek ket mismo a ni Agoyos ken ti sigud a nobyona tapnu laeng maiyaw-awan ti pamilyana.

Related: https://www.bomboradyo.com/baguio/balasang-a-maatap-a-nakidnap-ditoy-baguio-city-ken-suspek-iti-insidente-nakasuan-gapu-iti-kidnap-me-scheme-dagitoy/