BAGUIO CITY – Natiliw ti drug personality nga inawagan ti PDEA-Cordillera a ‘drug princess’ ti Baguio City kalpasan a nagpositibo ti naimplementar a search warrant iti pagtaengan daytoy sadiay No. 034 Magnolia Street, Upper QM, Baguio City idi rabii kalman.

Nabigbig daytoy a ni Alysia Allidem Singson, 29-anyos, online seller ken High Value Target dagiti otoridad.

Nakumpiskar iti operasyon ti innem a pakete ti maatap a shabu nga agdagsen ti agarup nasurok 12 a gramo ken aggatad ti mapattapatta nga P81,600.

Nakumpiskar metlaeng ti maysa a botelya a naglaon ti agarup nasurok 2 mL ti maatap a liquid meth, sumagmamano a pakete a naglaon ti mapapati a shabu residue, nagduduma a drug paraphernalia, maysa a caliber .38 ken siyam a bala ti nasao a paltog.

Iti agdama, sumangsangon ni Sison iti kaso a panaglabsing iti RA 9165 wenno ti Comprehensive Dangerous Drugs Act of 2002.

– ni PDEA-Cordillera regional director Gil Castro

Sigun kenni PDEA-Cordillera regional director Gil Castro, ti suspek a ni Singson ket anak ti maibilbilang a ‘drug queen’ ti Baguio City a ni Brenda Alidem Singson a nakabalud ita sadiay Bilibid ken kabsat ti serial rapist-killer convict a ni Christopher Allidem Singson.

-- Advertisement --

Innayonna a daytoyen ti maikatlo a daras a naiserbian ti search warrant ti nasao a balay da Singson nga agserserbi a drug den ken paglakuan ti iligal a droga.

Sigun pay kenkuana, dakkel a pukaw iti illegal drug trade iti lokalidad ti panakatiliw ti Singson nangruna ta atapenda a posible nga agtataud sadiay Bilibid ti suplay daytoy.

– ni PDEA-Cordillera regional director Gil Castro

Kasapulan a maideklara a nuisance ti pagtaengan ti da Singson a nakaisayangkatan ti search warrant idi rabii.

Impetteng ni Dir. Castro a babaen iti nasao nga addang ket saanen a maaramat ti nasao a balay iti transaksion ti iligal a droga.

Kinunana a repasuen ken adalen ti Legal Department ti PDEA ti ordinansa ti siudad mainaig iti panakaideklara ti maysa a pagtaengan a nuisance.

– ni PDEA-Cordillera regional director Gil Castro

Innayonna nga adda ti gakat iti lokal a konseho a mabalin a maipasidong iti forfeiture proceedings dagiti babbalay a maar-aramat iti iligal nga aktibidad kas iti krimen ken iti iligal a droga kalpasan a maideklara dagitoy a nuisance.

Dinakamatna pay a napimpintas no maaramat ti balay para iti pagsayaatan ti kaaduan ken saan ketdi a maaramat iti iligal a droga.