📸 Jovi Ganongan

BAGUIO CITY – Impabiang ti dadaulo ti Department of Tourism (DOT) – Cordillera ken ti provincial government ti Mountain Province kadagiti maseknan a lokal a gobyerno sadiay ti desisyon no mailukat dagiti munisipyo dagitoy para iti turismo wenno saan.

Kasaruno daytoy ti naisayangkat a dry-run iti panakailukat ti turismo ti Sagada, Mountain Province para kadagiti napili a lokal a turista tapnu masubok ti kinasagana ti munisipyo nga aglukat iti turismo.

-- Advertisement --

Sinakop ti dry run ti online registration dagiti sangaili, ti entry protocols kadagiti border checkpoints agingga iti panagparehistro dagiti sangaili kadagiti accommodation establishments.

Iti naangay nga assessment meeting, naobserbaran ti sumagmamano a parikut iti online registrations ken ti kinakurang dagiti accommodations, malaksid pay iti bassit a bilang dagiti nabakunaan kontra iti COVID-19 sadiay Sagada.

Naamuan a 10 laeng nga accommodations ti nagtungpal kadagiti requirements ti DOT idi naisayangkat ti dry run nupay 172 ti pakabuklan nga accommodation establishments sadiay Sagada ken tallo laeng ti DOT-accredited souvenir shops.

Inlawlawag met ni Sagada Municipal Tourism Action Officer Marites Abad a manarimaan ti panagtungpal dagiti dadduma nga accommodations kadagiti requirements ti DOT tapnu mapalubosan ti operasyonda.

Sigun pay kenni Sagada Mayor James Pooten Jr., makedngan to ti panakailukat ti turismo ti munisipyoda babaen kadagiti stakeholders, municipal IATF ken dagiti municipal officials malaksid a maikonsidera ti agdama a sitwasyon iti COVID-19 pandemic.