BAGUIO CITY – Linawlawagan ti maysa kadagiti maseknan a residente iti asideg ti Adonot River sadiay Bokod, Benguet ti agpasyo a napasamak iti nasarakanda a a beklat a nangan iti maysa a kalding.

Sigun kenni Jordan Durante, residente iti nasao a lugar ken ti maysa a kadagiti nangipablaak iti social media ti ladawan ti nasao a beklat, natayen ti beklat ken ti kalding a kinan daytoy.

Kinunana a naiyanod laeng ti beklat ken kalding iti nasao a karayan ken nakitada babaen metlaeng ti maysa a backhoe operator sadiay.

-- Advertisement --

Inlawlawagna a maatap a saan a nabaelan ti nasao a beklat a kanen ti nasao a kalding a nangitunda iti ipupusayna.

Ti nasao a beklat ket agarup 13 feet ken nasarakan iti patad a paset ti karayan ken naipaigid daytoy.

Linawlawaganna a saan a pudno a pinulutanda ti nasao a beklat a kas maibasar iti umuna nga impabuya ti maysa a TV network.

Kinunana a maysa ti nasao a beklat nga atapaenda a mangib-ibos wenno mangmangan kadagiti taraken iti lugarda nangruna dagiti manok.

Nupay kasta, nagbalakad daytoy kadagiti umili sadiay iti doble a panagannadda gapo iti peggad a mabalin nga itunda ti presensia dagiti dadakkel nga uleg wennu beklat iti nasao a lugar. (with Bombo Florence Paytocan)