BAGUIO CITY – Agtaltalinaed a lapped dagiti maipatpatungpal a paglintegan ken limitasyon kontra iti COVID-19 kadagiti sumagmamano a lugar iti pagilian, nangruna iti Metro Manila iti panakailako dagiti nateng nga agtataud iti rehion Cordillera.

Sigun kenni Department of Agriculture (DA) – Cordillera Regional Director Cameron Odsey, apektado ti marketing system wenno ti panakailako dagiti nateng manipud iti rehion, nangruna iti Benguet gaputa narigat a maibiahe dagiti natengda paturong kadagiti main buyers sadiay Metro Manila a kadawyan a pakaiturturongan dagiti nateng manipud iti probinsia.

-- Advertisement --

Dinakamatna a napintas ita ti produksion ti nateng iti rehion gapu iti simmayaat a panawen a ginundayawan met dagiti mannalon.

Naamuan a manipud iti 1,000 metric tons a nateng nga agtataud iti rehiyon ket nagbalinen a 2,000 metric tons manipud idi napalabas a bulan ti Marso agingga ita a bulan ti Mayo.

Iti baet daytoy, impannakkel ni Odsey nga adda metten ti ar-aramiden ti DA-Cordillera tapnu matulongan dagiti mannalon ken mapasayaat ti marketing dagiti nateng.

Kinunana nga ikagkagumaanda a mai-partner dagiti kooperatiba dagiti mannalon ditoy Cordillera kadagiti direct buyers manipud iti dadduma a rehiyon.

Innayonna a mapapintas to met ti presentasyon dagiti nateng babaen iti maipatpatakder a vegetable and packaging facility sadiay Benguet Agri-Pinoy Trading Center tapnu ad-adda a maawis dagiti buyers.

Ad-adalenda pay ti posibilidad a mailukat ti dadduma a market dagiti highland vegetables iti dadduma a rehion iti pagilian kas sadiay Visayas.