© kurtesyyy/Kurt Barbosa (instagram)

BAGUIO CITY – Nakwalipikar iti 2020 Summer Olympics wenno Tokyo Olympics ti Cordilleran taekwondo jin a ni Kurt Bryan Dela Vega Barbosa manipud Bangued, Abra.

Kasaruno daytoy ti panangabakna iti men’s 58-kg semifinals division iti 2021 Asian Taekwondo Olympic Qualification Tournament a naangay sadiay Amman, Jordan idi kanikadua, March 22.

-- Advertisement --

Ni Barbosa ti maikasiyam a Pilipino a nakwalipikar iti Tokyo Olympics ken kakaisuna a panakabagi ti Pilipinas iti taekwondo iti nasao nga international multi-sport event.

Naamuan a daytoy pay ti kaunaan a Pilipino a lalaki a taekwondo jin a nakwalipikar iti Olympics kalpasan ti 13 a tawen.

Ti 22-anyos ket gold medalist iti nen’s under 54-kg division ti 2019 Southeast Asian Games.

Iti met social media account ni Barbosa, impeksana a saan a nagbalin a nalaka ti dimmalananna kas maysa nga atleta.

Kinunana nga adu ti karit a napasaranna nangruna ita nga adda ti pandemya ken adayoda iti pamilayada.

Dinakamatna a naipasidongda iti training bubble iti sumagmamano a bulan tapnu agsanay a naimbag ken naipaayanda iti panawen a mangtutuk iti tarigagayda a maragpat, pakairamanan ti panangibagida iti pagilian iti nagduduma a kompetisyon ken iti panagragpat iti balligi.

Pinagyamananna met ti suporta ken tulong ti gobyerno, dagiti sponsors ken coaches dagitoy, malaksid pay iti Namarsua, pamilya ken papagayamna.

Mangnamnama pay daytoy nga agtultuloy ti suporta a maawatda nangruna ta ti balligi ti maysa ket balligi ti amin.

Inladawanna met a dayaw ti panangibagina iti Pilipinas ken ituloyna a mangipaay iti pammadayaw iti bandera ti pagilian.