-- ADVERTISEMENT --

BAGUIO CITY – Agtultuloy paylaeng a maipatpatungpal ti contact tracing kadagiti indibidual a nakapulapol ti maysa a trader a nagpositibo iti Delta variant ti COVID-19 sadiay La Trinidad, Benguet.

Sigun kenni Mayor Romeo Salda, kaam-ammoda laeng a nagpositibo iti Delta Variant ti nasao a trader kasaruno ti impormasyon nga impadanon kadakuada ti DOH-Cordillera idi Setyembre 26, 2021.

Kinunana a naipasidong iti swab test ti nasao a trader idi pay Agosoto 8, 2021 ken immimbag daytoy manipud iti COVID-19 idi Agosto 25, 2021.

Nupay kasta, kinunana nga idi laeng Setyembre 26 a naammuanda a nagpositibo daytoy iti Delta variant sigun iti panagsukimat nga impatungpal ti Philippine Genome Center (PGC).

Gapu iti daytoy, am-ammuen ita ti contat tracing team dagiti indibidual a nakapulapol ti nasao a pasyente iti La Trinidad Trading post ken iti panagbiahe daytoy sadiay Metro Manila.

-- ADVERTISEMENT --

Nakiddaw met iti nasao a pasyente nga isuratna dagiti nakapulapolna nga indibidual tapno nalaklaka a matunton dagitoy nangruna ta naladaw a naipaay ti resulta ti panagsukimat ti PGC.

Iti agdama, dumanonen iti innem ti pakabuklan a kumpirmado a kaso ti Delta variant sadiay La Trinidad, Benguet.

Kabayatana, naka-quarantine paylaeng ita dagiti 27 nga empleyado ti lokal a gobierno ti La Trinidad a nagpositibo iti COVID-19 itay nabiit.

Gapu iti daytoy, maipatpatungpal latta ti skeletal workforce iti nasao nga munisipyo gaputa malaksid kadagiti nagpositibo ket maipaspasidong met iti 14-day quarantine dagiti dadduma nga empleado daytoy.