photo | Police Regional Office Cordillera

BAGUIO CITY – Nagtaripnong manen dagiti tribal representatives ti Butbut ken Betwagan iti Kalinga-Mountain Province boundary, partikular sadiay Sitio Mamaga, Saclit, Sadanga, Mountain Province para iti maikadua a rikos ti peace talk nga idadauluan ni Police Regional Office Cordillera regional director PBGen. R’Win Pagkalinawan.

Nagresulta ti maikadua a saritaan kappia iti panangipeksa dagiti dua a tribo iti ceasefire commitment dagitoy ken iti panagkanunongda iti panakaisayangkat ti ‘sipat’.

Manamnama a ti panakaisayangakt ti ‘sipat’ ti agbalin a topiko dagitoy iti masungad a maikatlo a dayalogo ti dua a tribo.

-- Advertisement --

Nadutukan met kas ‘sipat holders’ dagiti indigenous peoples mandatory representative (IPMR) dagiti maseknan a barangay council ti Butbut ken Betwagan.

Dagus nga inawat ti Barangay IPMR ti Bugnay, Tinglayan ti panagbalinna a sipat holder bayat a nagkedked pay ti Barangay Betwagan, Sadanga ti panagawatna iti nasao a posisyon gaputa iparangna pay daytoy kadagiti kakadwana iti tribo.

Ti ‘sipat’ ket panagsinnukat ti peace tokens dagiti dua a tribo nga agserbi a mekanismo tapnu maituloy ti saritaan kappia ken dagiti sipat holders ti agserbi a taga-garantiya iti kappia ken mangiwanwan iti panagtultuloy ti saritaan kappia.