BAGUIO CITY – Bimmaba iti 70% ti kaso ti Children in Conflict with the Law (CICL) wenno dagiti ubbing a nagaramid iti krimen iti probinsia ti Benguet iti umuna a kwarter ti agdama a tawen no idilig idi napalabas a tawen.

Iti panakiyuman ti Bombo Radyo Baguio, dinakamat ni Provincial Social Welfare and Development (PSWD)-Benguet Juana Bannawe a dumanon iti pito a kaso ti CICL ti nailistada manipud Enero agingga Marso ti agdama a tawen, nababa daytoy iti 26 a kaso a nailistada idi napan a tawen iti kapada a bulan.

-- Advertisement --

Manipud iti nasao a bilang, nailista ti uppat a kaso ti panagrames, dua a kaso ti panagbastos ken maysa a kaso ti panagtakaw no sadinno lima kadagiti suspek ti nagadal iti elementarya bayat a dagiti dua ket sekondarya.

Impetteng ni Bananawe a tallo laeng a kaso ti naipila iti korte bayat a manarimaan paylaeng ti panakaiproseso dagiti uppat a kaso.

Binigbigna a maysa a rason ti panagaramid dagiti agtutubo iti mailabsing iti linteg ket ti panagbuyada iti pornography kabayatan ti online learning.

Gapu iti daytoy, iyap-apelana kadagiti nagannak ti panangbantayda kadagiti anakda kabayatan ti virtual learning gaputa saan a maliklikan a maawis dagitoy iti nagduduma a website nga agparparang iti cellphone wenno computer dagitoy.