BAGUIO CITY – Agsubsublin iti normal ti kinasaranta dagiti hotels ken restaurants ditoy siudad ti Baguio iti baet ti agtultuloy a pandemya.

Iti panakiuman ti Bombo Radyo Baguio, kinuna ni Hotel and Restaurant Association of Baguio (HRAB) spokesperson Andrew Pinero a kaaduan ita kadagiti empleyado dagiti hotels ken restaurants iti siudad ti nabilin nga agsubli iti trabaho.

-- Advertisement --

Kinunana a nanayonan metten ti bilang dagiti aldaw a panagtrabaho dagitoy iti linawas, no sadino, manipud iti sigud a dua agingga tallo nga aldaw iti linawas ket nagbalin metten nga uppat agingga lima nga aldaw iti linawas.

Innayonna a saanda a pilpiliten dagiti empleyado dagiti hotels ken restaurants nga agpabakuna kontra iti COVID-19 ngem ipapaayanda dagitoy iti balakas ken counseling mainaig iti kinapateg ti panagpabakuna, saan laeng a para iti bagi ngem ketdi, uray iti pagtatrabahuan dagitoy.

(ni Andrew Pinero, panakangiwat ti Hotel and Restaurant Association of Baguio)

Inaklon met ni Pinero nga adda dagiti sumagmamano a saan unay a dadakkel a hotels a miembro ti HRAB nga agingga ita ket mangad-adal no kabaelanda nga aglukat.

Sigun kenkuana, iti agdama ket 80% kadagiti hotels ken restaurants iti siudad ti nagsublin iti normal nga operasyon.

Maragsakan pay dagitoy gaputa iti baet ti panagtutudo ket adu latta dagiti sumangsang-at a turista nga agpaspasyar ditoy siudad.

(ni Andrew Pinero, panakangiwat ti Hotel and Restaurant Association of Baguio)

Impasiguradona met nga ar-aramiden dagiti hotels ti responsibilidadda tapnu mapagtalinaed ti kinatalged ti tunggal maysa ita a pandemya babaen iti panangikalikagumda iti triage certificate ken negatibo a test result manipud kadagiti turista sakbay a mapalubusan dagitoy nga ag-check-in.