BAGUIO CITY – Inaklon ita ti Benguet General Hospital (BeGH) nga agkurakurang daytoy iti supply ti oxygen gapu iti ngumatngato a kaso ti COVID-19.

Sigun kenni Dr. Meliarazon Dulay, acting chief ti BeGH, agsapsapulda ita iti suppliers ti oxygen tanks gapu iti dakkel a pagkasapulan iti daytoy.

-- Advertisement --

Kinunana a maiturturong ken maipilpila pay para iti refill dagiti oxygen tanks ti BeGH sadiay Pangasinan ken Tarlac.

Innayonna a sumagmamano pay nga aldaw ti mauray sakbay a makargaan dagiti oxygen tanks ti nasao nga ospital agsipud ta atiddog ti pila manipud iti nagduduma a lugar.

Malaksid iti daytoy, inaklonna pay nga agkurkurang ita ti BeGH iti ventilators para kadagiti ngumatngato a severe cases ti COVID-19.

Kinuna pay ni Dr. Dulay a saan nga umdas ti ab-abangan da nga oxygen machines ken ventilators manipud kadagiti pribado a kompanya agsipud ta dumandanon iti 200 agingga iti 300 ti mailislistada a kaso ti nasao a sakit iti inaldaw.

Sigun pay kenkuana, maib-ibus metten ti pondo para iti panakagatang dagiti supplies iti pagagasan isut gapuna nga agpatpatulonga iti provincial government ken iti DOH.