BAGUIO CITY – Natiliw ti maysa a maysa a barito ken maysa a drug personality iti nagsina a buy-bust operations nga insayangkat dagiti otoridad ditoy siudad ti Baguio idi kalman.

Immuna a natiliw ti barito a 16-anyos a residente ti Lower Quirino Hill Barangay iti operasyon sadiay Gearlan Street, Campo Filipino Barangay.

Nakumpiskar kenkuana ti dua a pakete ti maatap a napagango a bulbulong ti marijuana nga agdagsen ti 0.20 grams.

Simmaruno a natiliw iti operasyon sadiay AZCKO Barangay ti maibilbilang nga street level individual iti iligal a droga a nabigbig a ni Xian Naulgan Bangcawayan, 28-anyos, baro, tubo ti Mountain Province ken residente ti Purok 2, Pinsao Barangay.

Nakumpiskar kenkuana ti tallo a pakete ti maatap a shabu nga agdagsen ti dua a gramos.

-- Advertisement --

Agpada a nakumpiskar kadagiti dua nga indibidual ti cellphone nga inaramatda iti transaksionda kadagiti operatiba ken narekober pay iti ikot dagitoy dagiti naaramat a buy-bust money.

Iti agdama, agpada a sumangsango dagitoy iti kaso a panaglabsing iti RA 9165 wenno ti Comprehensive Dangerous Drugs Act of 2002.