BAGUIO CITY – Addaanen ti Tabuk City, Kalinga iti 43 a barangay kasaruno ti panangratipikar dagiti umili sadiay iti linteg a nangisina iti lima a sitios ti Barangay Lacnog.

Sigun kenni Tabuk City Election Officer Atty. Reyman Solbita, iti naisayangkat a plebisito idi Sabado ket nagresulta daytoy iti panagbotos iti ‘wen’ dagiti 2,381 a botante ken panagbotos iti ‘saan’ dagiti 51 a botante.

Inlawlawagna a gapu iti daytoy ket maawaganen a Barangay Lacnog West dagiti sitio ti Guina-ang, Madopdop, Mallango, Lanlana ken San Pablo bayat a dagiti nabati a lima a sitio ti mangbukel iti Barangay Lacnog East.

-- Advertisement --
paset ti deklarasyon iti resulta ti plebisito iti panakagudwa ti Barangay Lacnog, Tabuk City

Innayonna a dagiti umuna nga opisyales ti Barangay Lacnog West ket dutukan ti Provincial Governor ti Kalinga ken agtugaw dagitoy iti takem agingga nga adda ti mabotosan a mangsukat kadagitoy.

Immunan a kinuna ni Atty. Solbita a ti panakabukel ti Barangay Lacnog West sagudayen ti Republic Act No. 11328 a pinirmaan ni Presidente Duterte idi April 2019.