-- ADVERTISEMENT --
photo | Bfpcar K Pinukpuk

BAGUIO CITY – Malamlamayan ita ti maysa a baro kalpasan a nakuryente bayat ti panagkalapna iti Saltan River sadiay Palling, Taga, Pinukpok, Kalinga.

Nabigbig daytoy a ni Ferdinand Dela Cruz Balbi, 47-anyos ken residente ti Denglo, Taga, Pinukpuk, Kalinga.

Iti inisyal a report ti Pinukpuk Municipal Police Station, inyuman kadakuada ti maysa a maseknan a residente ti nasarakanda a bagi ti nasao a mangngalap iti asideg ti karayan a nagkalapan daytoy.

Naamuan a nagturong ni Balbi iti nasao a karayan idi pay kanikadua tapno agkalap ken nagaramat daytoy ti improvised electric fishing gear.

Iti panangipatungpal dagiti otoridad iti search and retrieval operation, nasarakan ti bangkay ni Balbi iti agarop alas-tres ti malem idi kalman babaen iti tulong ti maysa a maseknan a residente a nakakita iti bagi ni Balbi.

-- ADVERTISEMENT --

Inyawid ti maseknan a pamilya ti bangkay ni Balbi kalpasan a nakumpirmarda ti pakabigbigan daytoy.