-- ADVERTISEMENT --

BAGUIO CITY – Naisangpeten ti bangkay ni Patrolman Franklin Marquez iti pagtaenganda sadiay Tadian, Mt. Province idi malem kalman.

Sakbay daytoy, naiturong pay ti bangkayna sadiay Camp Major Dennis Molintas, Bangao, Buguias idi parbangon kalman para iti pamisa sakbay a naiyawid.

Naamoan a ni Marquez ket naidestino sadiay Camp Major Dennis Molintas sakbay a nagsanay iti commando sadiay Samar.

Inladawan ni Benguet Provincial Director Pcol Reynaldo Pasiwen a naanos ken narespeto ti police rookie kadagiti seniors ken liders daytoy.

Maipalagip a karaman ni Marquez a pimmusay iti napasamak nga engkwentro iti nagbaetan ti pulisya ken ti terorista a grupo sadiay Barangay Lonoy, Gamay, Northern Samar idi Nobiembre 20.

-- ADVERTISEMENT --

Immunan a nabigbig ti kadwana a pimmusay a ni Patrolman Jimmy Caraggayan manipud Tuguegarao City, Cagayan.

Naduktalan metlaeng a nadangran ti uppat a kakadwa dagitoy kalpasan a nangipabettak dagiti terorista a grupo ti improvised explosive devices.

Agpada a maipaspasidong dagiti biktima iti Special Action Force Commando Course (SAFCC) idi nakaengkwentroda dagiti saan pailaeng a nabigbig a kameng ti terorista a grupo.

Inkari met ni PNP Chief, PGen. Dionardo Carlos a maipaayan ti tulong dagiti naulila a pamilya ken impanamnamana a maiserbi ti hustisia iti napasamak nga insidente.