-- ADVERTISEMENT --

BAGUIO CITY – Nabigbigen ti bangkay ti lalaki a nasarakan iti rangkis sadiay Poyopoy, Taloy Sur, Tuba, Benguet idi kalman.

Nabigbig daytoy a ni Akiya Lugares Velasco, 24-anyos, residente ti Baguio City.

Iti panakiuman ti Bombo Radyo Baguio iti kabagyan ni Akiya, naamuan nga idi laeng malem ti Wednesday a naudi a nakasaritada daytoy ken impatalged kadakuada ni Akiya a nasayaat ti pisikal a kasasaad daytoy ken adda daytoy sadiay Camp 7, Baguio City.

Nupay kasta, nagturongda iti istasyon ti pulisya iti kalman ti agsapa tapnu agpatulong gaputa nagatap dagitoy nga adda ti dakes a napasamak kenni Akiya.

Kinunada nga impanda ti bangkay ni Akiya sadiay BGHMC para iti swab test ken ur-urayenda laengen ti resulta tapnu maipaayanda iti umno a lamay ti bangkay.

-- ADVERTISEMENT --

Kagiddan iti daytoy, iyap-apela ti pamilya ti nainget nga imbestigasyon iti insidente ken ti panakaipaay ti hustisya kenni Akiya.

Impettengda a no adda man ti basol ni Akiya ket naibalud laengen kuma daytoy.

Maibasar iti rekord ti pulisya, nakalista ni Akiya kas maysa a High Value Individual nga agar-aramat ken agilaklako ti iligal a droga.

Natiliw ni Akiya idi April 22, 2021 sadiay Bokawkan Road iti buy-bust operation, kadwana ti managan Jhaniel Dale Foronda.