BAGUIO CITY – Kinumpirmar ti Provincial Veterinary Office ti Ifugao a nakastreken ti African Swine Fever (ASF) virus sadiay.

Iti interbyu ti Bombo Radyo kenni Ifugao Provincial Veterinarian Dr. James Gopeng, kinunana nga apektado iti ASF ti Banaue, Kiangan, Lagawe, Asipulo ken Hingyon.

Sigun kenkuana, nasuroken iti 160 a baboy a naipasidong iti culling wenno naigagara a napapatay kadagiti nasao a munisipyo no sadino, 74 ti napapatay sadiay Kiangan, 40 sadiay Lagawe, 8 sadiay Asipulo ken nasurok 40 sadiay Banaue.

-- Advertisement --

Dinakamatna a manamnama nga adda pay dagiti baboy a maipasidong iti culling kadagiti sumaruno nga al-aldaw.

Innayonna nga inpalubos dagiti hog raisers ti panakapapatay dagiti taraken dagitoy a baboy nupay nagbalinda nga emosional gapu iti panaka-apektar ti pagbiaganda.

Nupay kasta, impanamnama ni Dr. Gopeng a maipaayan iti tulong dagiti naapekataran nga agtartaraken iti baboy.

Imbingayna a maysa a posible a rason iti napartak a panagwaras ti ASF sadiay Ifugao ket dagiti saan a mabambantayan nga entry points ti probinsia nangruna iti nagbeddanganda kadagiti kabangibang a probinsia a posible a nakaiserrekan dagiti baboy nga apektado iti ASF.

Kinunana a nainget dagiti maipatpataungpal a checkpoints sadiay Ifugao ngem inaklonna a posible nga adda latta dagiti nangilibas a mangiserrek kadagiti baboy a saan a dimmalan iti umno a proseso.

Malaksid iti daytoy, kinuna pay ni Gopeng a maysa met laeng kadagiti posible a rason ket ti pannakaiwaras dagiti karne ti baboy wenno watwat kabayatan dagiti okasion.

Inlawlawagna a naka-ugalian dagiti residente ti Ifugao a no tumabuno dagitoy iti okasion ket mangiyawidda iti karne ti baboy.

Gapu iti daytoy, kiniddaw manen ti veterinarian ti pannakitinnulong ti tunggal maysa tapno saanen a karkaro nga agwaras ti ASF sadiay Ifugao.

Kabayatanna, irekomendarna kenni Governor Jerry Dalipog ti panakaideklara ti state of calamity sadiay Ifugao gapu iti epekto ti ASF sadiay.

Dinakamatna pay a nakitaan iti sintomas ti ASF ti dadduma nga ili sadiay Ifugao, malaksid kadagiti immunan a nagpositibo.

Maipalagip a nakaipasidongen iti lockdown ti Ifugao gapu iti epekto ti nasao a sakit dagiti baboy.