BAGUIO CITY – Manamnama a maisayangkat ti public hearing ita nga aldaw sadiay Baguio Convention Center seknan iti aplikasyon ti RCC Global a mangilukat iti e-BINGO ditoy Baguio City.

Iti panakiuman ti Bombo Radyo Baguio, kinunana ni Councilor Betty Lourdes Tabanda a nagbubotos dagiti amin a konsehal tapno maamoan no maipaayan ti “resolution of no objection” ti nasao a kompanya.

-- Advertisement --

Dinakamatna a siyam a konsehal ti immanong iti panakaipaay ti nasao a resolusyon bayat a lima met ti nangtubngar pakairamananna ken da Philian Louise Weygan-Allan, Mylen Yaranon, Isabelo Cosalan Jr., ken SK Levy Lloyd Braza Orcales.

Nupay kasta, saan a pinirmaan daytoy ni Mayor Benjamin Magalong gaputta impettengna a nasken paylaeng a maipasidong iti public consultation tapno mangngegan met ti beneg dagiti umili nangruna ta dagitoy ti maapektaran iti kanito a mailukat ti pasugal.

Gapu iti daytoy, guyguyoguyen ni Tabanda ti publiko a makipaset iti public consultation tapno maidanonanda met dagiti karirikna wenno opinyon dagitoy seknan iti daytoy a banag.

Impanamnamana a denggen ti lokal a konseho dagiti kapanunutan ti publiko sakbay a maipasidong manen iti votation ken daduma pay a proseso para iti panakabukkel ti pinal a desisyon.

ni Councilor Betty Lourdes Tabanda