BAGUIO CITY – Inawat dagiti 314 nga estudyante ti educational assistance fund dagitoy a dumanon ti P6,000 manipud iti lokal a gobyerno ti Baguio.

Dagiti nasao nga estudyante ti mangbukbukel iti umuna a batch dagiti benipisaryo ti educational financial assistance iti sidong ti City Ordinance No. 116, Series of 2020 wenno ti ordinansa a mangipapaay ti tulong pinansial kadagiti estudyante ti kolehio.

Sagudayen ti ordinansa a dagiti benipisaryo ket dagiti nakukurapay ngem maiparbeng nga estudyante a residente ti siudad.

-- Advertisement --

Kagiddan iti daytoy, kinuna ti lokal a gobyerno ti Baguio a manarimaan paylaeng ti aplikasyon para iti College Education Financial Assistance Grant para iti maikadua a batch dagiti benipisaryo para iti umuna a semestre ti 2020-2021 ken iti masungad a semestre.

Naamuan nga 800 ti puntirya a benipisaryo iti nasao a tulong pinansial ngem agarup 500 ti kurang kadagitoy isut gapuna a maiyaw-awis ti panagaplikar ditoy dagiti kwalipikado nga estudyante.