BAGUIO CITY – Pinaglibakan ti PhilHealth-Benguet ti alegasion a magungundawayan ti PhilHealth account wenno PhilHealth identification number dagiti indibidual a mangaramat iti daytoy para iti panagpasidongda ti swab test.

Sigun kenni Janet Palaez, Chief Social Insurance Officer ti PhilHealth-Benguet, naidanon kadakuada ti nasao nga alegasyon.

-- Advertisement --

Nupay kasta, impettengna nga awan ti ebidensia a mangpaneknek iti nasao nga alegasyon ken awan met ti written document iti alegasyon malaksid pay nga agkedked dagiti agrekreklamo nga agfill-up ti complaint form no allukuyenda met dagitoy nga agsurat.

Maipalagip a timmaud dagiti alegasyon nga agserserbi ti account ti maysa a member ti PhilHealth kas basaran iti agbalin a resulta no agpaisidong ti maseknan iti swab test.

Inyunay-unay ni Palaez a saan a maisubli wenno mai-reimburse ti PhilHealth ti binayadan ti kliyente a nagpa-swab test no awan ti PhilHealth number daytoy.

Innayonna a saan a mabalin a maaramat ti philhealth account no saan daytoy a tinintinnagan ti maseknan nangruna ta adda ti portal ti ahensia a pagkitaan iti estado ti maysa a member.

Innayonna a libre ti swab test kadagiti accredited ti PhilHealth kas iti Baguio General Hospital ken Benguet General Hospital no ti agpa-swab test ket aktibo a miembro ti PhilHealth.