-- ADVERTISEMENT --

BAGUIO CITY – Manamnama pay a manayunan ti bilang dagiti rebelde ken mangsupsupotar iti rebelde a grupo a boluntaryo a sumuko kadagiti otoridad ditoy rehion Cordillera sakbay nga agleppas ti agdama a tawen, 2020.

Sigun kenni Police Brig. Gen. R’win Pagkalinawan, dadaulo ti Police Regional Office Cordillera (PROCOR), daytoy ket gaputa adu latta ken agtultuloy nga adda dagiti sumuksuko a rebelde ken mangsupsupotar iti rebelde a grupo iti baet ti mapaspasaran a pandemya.

Kinunana nga dumanonen iti 100 a rebelde ti simmuko iti gobyerno, pakairamanan dagiti dadaulo ti nagduduma a yunit ti rebelde a grupo ditoy Cordillera.

Impannakkelna a resulta daytoy ti panangtutukda iti kampanya kontra iti panagrebelde tapnu magibusanen ti armado a pananglaban iti gobyerno.

Sigun kenkuana, matungtungpal daytoy babaen iti panakaipaay ti nagduduma a serbisyo ti gobyerno kadagiti nasusulinek a lugar a sigud nga addaan presensia dagiti rebelde.

-- ADVERTISEMENT --

Pagyamyamananna pay ti kina-aktibo dagiti barangay ken municipal officials iti kampanya tapnu maparmeken dagiti rebelde iti masakupan dagitoy.