-- ADVERTISEMENT --

BAGUIO CITY – Agtultuloy ti panagkapoy ti pwersa ti New People’s Army (NPA) nga armado a sanga ti Communist Party of the Philippines (CPP).

Impasigurado daytoy ni Capt. Rogelio Agustin Jr., Civil Military Operations Officer ti 503rd Infantry Brigade ti Philippine Army iti panakiuman ti Bombo Radyo Baguio kagiddan ti panangrambak ti NPA iti anibersaryo dagitoy itay kanikadua.

Sigun kenkuana, napilay ti NPA kalpasan nga adda dagiti napasag a kakadwa ken lider dagitoy kadagiti kaudian nga engkwentro iti nagbaetan dagitoy ken ti tropa ti gobyerno ditoy rehion Cordillera.

Kinunana a gapu iti daytoy, awanen dagiti sumarsaruno a mangdoktrina kadagiti umili ti Cordillera tapnu makikappeng iti nasao a grupo.

Innayonna nga awanen ti mapanan dagiti nabatbati a kameng ti NPA ken marigrigatanen dagitoy nga ag-rekruit kadagiti sibilyan.

-- ADVERTISEMENT --

Gapu iti daytoy, aw-awisenna dagiti rebelde a kayatda ti sumuko nga agsublidan iti sidong ti gobyerno nangruna ta adda ti nakasagana a tulong para kadagitoy.

Kabayatanna, impasigurado pay ni Capt. Agustin Jr. nga umdas ti pwersa ken kapabilidad dagiti soldado iti Cordillera a mangsalwad kadagiti umili ken iti rehion manipud kadagiti rebelde a manggungundaway kadagiti sibilyan.

ni Capt. Rogelio Agustin Jr., Civil Military Operations Officer ti 503rd Infantry Brigade ti Philippine Army

Kabayatanna, inyunay-unay ti Police Regional Office Cordillera (PROCOR) a saan a solosyon ti panagrebelde ken panaglaban iti gobyerno kadagiti lehitimo a parikut iti kagimongan a sangsangwen dagiti umili.

Nagbalin a waragawag daytoy ni PCapt. Marnie Abellanida, Public Information Officer ti PROCOR kagiddan ti anibersaryo ti New People’s Army (NPA) nga armado a sanga ti Communist Party of the Philippines idi kalman.

Iti interview ti Bombo Radyo Baguio, kinunana a nasken nga agannad ita dagiti agtutubo ken dagiti nainsigudan nga umili manipud kadagiti panagallilaw dagiti kameng ti nasao a grupo.

Innayonna nga awan ti pagmaayan ti nabayag nga ilablaban dagiti NPA nangruna ta ngumatngaton ti panaka-ammo dagiti umili kadagiti panag-allilaw ti nasao a grupo.

Sigun kenkuana, saan a sumarsardeng ti panakitaripnong ti tropa ti gobyerno kadagiti umili, nangruna kadagiti narisgo iti impluwensia ti NPA tapnu paka-ammuan dagitoy ken mailiklikda iti panakabiktima iti nasao a grupo.

Innayonna a saan a mauma ti militar a mangallukoy kadagiti nabatbati a kameng ti NPA tapnu sumukodan ken agnumar kadagiti programa ti gobyero a nairanta para kadagiti rebelde a sumuko ken agbiag a nakappia iti denna ti pamilya dagitoy.

ni PROCOR Public Information Officer PCapt. Marnie Abellanida