BAGUIO CITY – Ad-adda pay a naingetan ti kampania ti lokal a gobierno ti Tabuk City, Kalinga kontra iti African Swine Fever (ASF).

Sigun iti Tabuk City City Veterinary Office (CVO), agtultuloy ti operasion dagiti veterinary quarantine checkpoint, pannakaipatungpal ti periodic monitoring kadagiti paglakwan iti karne, pannakaipatungpal ti surveillance ken regular a disinfection.

-- Advertisement --

Maibasar iti report ti opisina, dumanon iti 6,977 ti bilang dagiti baboy a natay gapu iti ASF sadiay Tabuk City manipud September 20, 2019 aginggat July 20, 2020.

Malaksid iti dayta, naipasidong iti culling ti 130 a baboy manipud Hulyo 20 aginggat Setiembre 9 ti agdama a tawen.

Iti bilang dagiti natay a baboy, 1,199 ti manipud Barangay Bulanao, 912 ti manipud Agbannawag ken 753 sadiay Lacnog.

Agkolkoletar ti CVO iti blood sample kadagiti baboy a maatap nga addaan iti ASF ken no makumpirmar a positibo dagitoy, maipatungpal ti boluntario ken selective depopulation tapno makontrol ti panagwaras ti African Swine Fever.