BAGUIO CITY – Agarup 3,000 a turista ti iyakomodar ti Baguio City iti inaldaw pakairamanan dagiti agtaud iti NCR Plus.

Kasaruno daytoy ti panangipalubos ti Inter Agency Task Force (IATF) iti leisure travel kadagiti lugar a naipasidong iti Modified General Community Quarantine.

-- Advertisement --

Resulta met daytoy iti report nga insumiter ti lokal a gobyerno iti National IATF a kabaelan ti siudad nga imanehar ti kaso ti COVID-19.

Inyunay-unay met ni Mayor Benjamin Magalong a nasken latta nga agrehistro dagiti turista iti visita.baguio.gov.ph ken mangipakita dagitoy iti negatibo a resulta ti RT PCR test wenno Antigen test.

Maipalagip nga impalubos ti nasyonal a gobyerno ti panagbiahe dagiti residente iti NCR Plus kadagiti lugar nga adda iti sidong ti modified general community quarantine.

Sigun kenni City Administrator Bonifacio De la Pena , uray naka-GCQ ti Baguio ket maipalubos latta ti panagturong ditoy dagiti turista manipud NCR Plus gapu iti resolusyon ti IATF idi pay Pebrero a nangipalubos iti panagawat ti siudad kadagiti turista gapu iti epektibo a panakaimaton ti COVID-19.

Innayonna a nangrugin ti panagawatda iti aplikasyon dagiti turista manipud NCR Plus a kayatda ti agbisita ditoy siudad.

Mangnamnamada a babaen iti panakaipalubos ti leisure travel kadagiti residente ti NCR Plus ket manayonan dagiti turista a mapasangbay ti Baguio a makatulong iti agtultuloy a panagrekober ti sektor ti turismo ditoy siudad.

Kabayatana, naragsakan dagiti opisyales ti Baguio City iti sumaysayaat a sitwasyon ti siudad partikular ti ekonomiya.

Inaklon ni Mayor Benjamin Magalong a dakkel ti naitulong dagiti leisure travel iti in-inot a panagdur-as manen ti ekonomiya ti siudad.

Immuna iti dayta, dinakamatna a 70% kadagiti turista ket manipud NCR Plus nga iti agdama ket napalubosanen nga agbisita kadagiti tourist destination ti siudad.

Kagiddan iti dayoy, impanamnama ni Mayor Magalong a manayonan ti bilang dagiti bus nga immunan a napalubosan nga agbiahe paruar ken pastrek ditoy siudad.