-- ADVERTISEMENT --

BAGUIO CITY – Kinasaritan ti Commission on Higher Education (CHED) – Cordillera dagiti council of deans dagiti pagadalan iti rehion mainaig iti panakaipatungpal ti napalawa a limited face-to-face class iti tallo a cluster programs.

Iti panakiuman ti Bombo Radyo Baguio kenni CHED-Cordillera Regional Director Dr. Demetrio Anduyan Jr., kinunana nga addan ti baro a CHED Memorandum Order para iti implementasyon ti limited face-to-face class iti engineering programs, tourism managemet, tourism ken industrial technology.

Kinunana nga agarup amin a pagadalan iti Cordillera a mangididiaya kadagiti kurso a mangsaksakop kadagiti tallo nga skills-based programs ti nangipeksa iti intensionda nga agaplikar para iti limited face-to-face class.

Dinakamatna nga apaman a maawatda amin a dokumento dagiti agaplikar a pagadalan ket mangisayangkat ti CHED, kadwada ti maseknan a local IATF iti inspeksion kadagiti nasao a pagadalan tapnu masigurado ti panagtulnog dagitoy kadagiti pagalagadan iti implementasyon ti limited face-to-face class.

Imbinglayna a mismo a dagiti estudyante ken dagiti pagadalan ti nagkiddaw ti panakaipalubos ti limited face-to-face class gaputa makurangan dagitoy iti online learning.

-- ADVERTISEMENT --

Nupay kasta, linawlawagan ni Dr. Anduyan a ti panakaipatungpal ti limited face-to-face class ket agbasar iti quarantine status ti lugar a pakasarakan ti maseknan a pagadalan.

Maipalagip nga iti agdama ket 12 a pagadalan iti Cordillera ti mangisaysayangkat ti limited face-to-face classes para iti health and allied health science courses.