-- ADVERTISEMENT --

BAGUIO CITY – Maal-alarma ita ti lokal a gobierno ti La Trinidad gapu iti ad-adda a panagngato ti kaso dagitoy iti COVID-19 ken panakanayun ti kasoda iti Delta variant.

Sigun kenni Mayor Romeo Salda, dumanon itan iti 40 agingga 43 ti mailislistada a kaso tunggal aldaw rason iti panakapunon dagiti isolation facilities nga insagana dagitoy, pakairamanan dagiti pagagsan iti masakupan ti munispyo.

Gapu iti daytoy kidkidawena wennu isingsingasingna kadagiti barangay officials ti panangisaganada kadagiti bukodda nga isolation facilities tapnu adda ti pakaiturungan dagiti minor covid-19 cases dagitoy.

Kinunana a posible metlaeng a maaramat dagiti pagadalan sadiay tapnu agbalin nga Temporary Treatment Monitoring FACILITY (TTMF) dagiti asymptomatic a pasiente.

Kabayatana, manarimaan metten ti panakaisayangkat ti contact tracing iti maysa manen a kasoda iti delta variant a nailistada itay nabiit.

-- ADVERTISEMENT --

Nupay kasta, kinuna ti DOH a nakarekoberen ti nasao nga pasiente ngem nasken latta a maduktalan nu asino dagiti nakapulapol daytoy tapnu dagus a maipasidong iti quarantine ken swab testing.

Iti agdama ket dumanonen iti 462 dagiti aktibo nga kaso iti covid-19 sadiay ken ti La Trinidad ti nakailistaan ti adu nga kaso iti nasao a sakit manipod iti 13 nga munisipyo iti Benguet kalpasan ti pannakailistada iti pakabuklan nga 4,787 a nagpositibo iti nasao a sakit.