BAGUIO CITY – Posible a gumatang ti lokal a gobierno ti Baguio ken ti DepEd iti nasurok 8,000 a tablets a maiwaras kadagiti mapili nga estudyante iti siudad.

Sigun kenni Baguio City Schools Division Superintendent Marie Carolyn Verano, nailatangan ti paggatang kadagiti tablets iti P45M manipod iti pondo ti Dep-Ed Baguio ken ti lokal a gobierno.

-- Advertisement --

Kinunana a babaen iti daytoy ket marisot ti pakaseknan iti kinakurang ti gadgets nga ar-aramaten dagiti estudyante ita a maipatpatungpal ti blended learning kabayatan ti pandemya.

Innayonna nga adda ti nasurok 60,000 nga estudyante ditoy siudad isut gapuna a mapili laeng dagiti estudyante nga awanan ti ar-aramaten a gadget.

Dinakamatna a maaddaan metlaeng ti guidelines a nasken a suruten dagiti maipaayan ti nasao a gadget tapno maliklikan ti panakadadael dagitoy.

Sigun pay kenni Verano, maysa metlaeng nga ad-adalen dagitoy a sistema para kadagiti magatang a tablets ket ti panangipabulodda kadagitoy kadagiti agkasapulan unay nga estudyante.

ni Baguio City Schools Division Superintendent Marie Carolyn Verano