photo | PROCOR

BAGUIO CITY – Sumangsango ita iti kaso a panaglabsing iti Presidential Decree 1602 wenno illegal gambling ti walo nga indibidual kalpasan a natiliw dagitoy iti nagsina nga anti-illegal gambling operations iti probinsia ti Benguet idi tapos ti Mayo, 2021.

Nabigbig dagitoy a da Johnkere Binbinon Bughong, 37; Philip De La Cruz Ambeguia, 49; Norton Bato Tomas, 34; Odee Tauli Dangbis, 28; Edmund Abag Morca, 48; Clifford Tomas Bato, 33; Belmer Malipat Adais, 31 ken Dennis Almoza Cornel, 32.

-- Advertisement --

Maibasar iti report ti pulisya, manarimaan ti panagpatrolya dagiti pulis idi May 30 iti deppaar ti National Housing Authority sadiay Tadiangan, Tuba idi naranaanda ti tallo nga indibidual nga agpalpallot.

Nagresulta daytoy iti panangtiliwda kada Bughong ken Ambeguia bayat a nakalibas ti maysa pay nga indibidual.

Nakumpiskar ti taya ken dua a kawitan a para pallot.

Nagresponde met dagiti pulis idi May 31 iti impormasyon a naawatda seknan iti iligal a sugal sadiay Purok 2, Loakan, Itogon a nagresulta iti panakatiliw ti innem nga indibidual.

Nakumpiskar ditoy ti baraha ken taya.

Dinadael ken inuram pay dagiti pulis sadiay Luneta, Loakan, Itogon ti maysa a naaramid a pagpallotan idi May 20.