BAGUIO CITY – Dumanon iti 60 a pagadalan manipud iti nagduduma a probinsia iti Cordillera ti nairaman kadagiti inisyal a napili para iti plano ti Department of Education (DepEd) a panakaisayangkat ti pilot face-to-face classes manipud kadagiti pagadalan kadagiti ‘low-risk’ areas ditoy pagilian iti entero a bulan ti Enero iti sumaruno a tawen 2021.

Sigun kenni DepEd-Cordillera regional director Estela Cariño, karaman dagiti sag-sangapulo a pagadalan sadiay Abra, Apayao, Ifugao, Kalinga, Mountain Province ken Tabuk City kadagiti inisyal a napili para iti limitado a face-to-face learning.

Dinakamatna a dagitoy a pagadalan ket masarakan kadagiti low-risk areas nga awanan ti kaso ti COVID-19.

-- Advertisement --

Innayonna a dagiti nasao a pagadalan ket inrekomendar a mismo dagiti maseknan a lokal a gobyerno ken nasken nga adda ti pammalubos dagiti nagannak iti panakipaset ti annakda iti pilot face-to-face classes.

Nupay kasta, linawlawaganna a saan pay a pinal dagiti nasao a pagadalan ken naipaayan ti opisinada iti agingga inton bigat tapnu mangisumitir iti pinal a rekomendasyon bayat a ti DepEd Central Office ti agdesisyon iti pinal a listaan dagiti pagadalan a mangisayangkat ti makabulan a face-to-face learning.

Inlawlawagna met a panggep ti plano a matulongan dagiti agkasapulan nga estudyante, nangruna iti academic ken uray pay iti psychological.