-- ADVERTISEMENT --

BAGUIO CITY – Maragsakan ni Baguio City Mayor Benjamin iti maar-aramidan ti lokal a gobyerno tapno mabakunaan dagiti umili kontra iti Covid-19.

Iti eksklusibo nga interview kenkuana ti Bombo Radyo, kinunana a dumanon itan iti 50% kadagiti mapunpuntirya nga umili iti Baguio City ti naan-anayen a nabakunan.

Sigun iti datos, dumanon iti 66.32% ti immawat iti 1st dose ken nasurok 51% met ti immawat iti 2nd dose.

Gapu iti daytoy, mangnamnama ni Mayor Magalong a madanon ti siudad ti 60 agingga 70% a bilang ti naan-anay a nabakunaan intun Oktobre ken podible a magun-od ti puntirya ti siudad a 95% wenno nasursurok pay nga herd immunity iti mabiit.

Inlawlawag ti opisyal a nakatulong ditoy ti nasapa a panagtignay ti lokal a gobierno a gumatang iti bakuna kontra COVID-19 malaksid iti ipapaay ti nasyunal a gobierno.

-- ADVERTISEMENT --

Patienna a nakatulong ti panagbalinna a miembro iti National task Force kas contact tracing czar ti pagilian iti pananggun-od ti siyudad iti supply ti bakuna manipod iti nasyonal a gobierno.

Innayon ti mayor a nasurok 50,000 doses manipud iti pakabuklan a 380,000 a ginatang ti lokal a gobyerno ti naaramaten iti siyudad.

Kabayatanna, mangnamnama pay ni Mayor Magalong nga maaprobranen ti panakabakuna dagiti ubbing nga agtawen iti 12-17.

Daytoy ket agsipud ta ngimmato iti 41% ti kaso ti COVID-19 kadagiti nasao nga edad.

Iti sabali a bangir, inlawlawagna a mangibing-bingay met ti siudad iti supply ti PPEs ken bakuna iti probinsia ti Benguet ken iti dadduma pay nga probinsia iti rehiyon Cordillera.