BAGUIO CITY – Mapatta-patta a 50 a porsiento wenno kagudua iti populasyon dagiti Persons with Disabilities iti siudad ti Baguio ti naan-anayen a nabakunaan kontra COVID19.


Iti panakipatang ti Bombo Radyo Baguio, inlawlawag ni Samuel Aquino manipud iti Persons with Disability Affairs Office iti mayor’s office a karaman kadagiti nabakunaan a PWDs ket dagiti essential ken frontline workers kasta met dagiti addaan iti seryoso a sakit.

-- Advertisement --


Mangnamnana daytoy nga adu pay a PWDs ti agnumar iti agtultuloy a mobile vaccination ti siudad ti Baguio.
Innayona a maipangpangruna a mabakunaan dagiti PWDs nga karaman iti A1 category agsipud ta adda ti inlatang ti lokal a gobierno a bakuna para kadagitoy.


Inaklon met ni Aquino nga adda latta dagiti PWDs nga agkedked nga agpabakuna gapu iti personal a rason dagitoy.
Iti baet daytoy, kinunana nga agtultuloy latta ti addang nga ipatpatungpal ti opisinada tapno adu ti maguyugoyda nga agpabakuna kontra iti COVID19.

Kabayatana, innayonna a temporario a nakanselar dagiti proyekto ken programa ti lokal a gobierno ti Baguio para kadagiti PWDs gaou iti agtultuloy a pangta ti pandemya.


Iti baet daytoy, kinuna ni Aquino a makium-umanda iti nasional a gobierno para iti panakaipaay ti pinansial a tulong kadagiti PWDs nga apektado iti pandemya.

Mangnamnama daytoy a patgan ti Department of Tourism (DOT) ken Department of Labor and Employment (DOLE) ti kiddawda a maipaayan iti agtultuloy nga assistance dagiti PWDs.


Kinunana nga idi napan a tawen, dumanon iti uppat a milyon a pisos a gatad ti rice subsidy ken COVID19 kits ti inwaras ti lokal a gobierno kadagiti agarup 4, 000 a PWDs iti lokalidad.