-- ADVERTISEMENT --
photo | PDEA-Cordillera

BAGUIO CITY – Nakemmeg ti uppat a drug personalities bayat a nakumpiskar kadakuada ti agarup P70-K a gatad ti maatap a shabu iti panangipatungpal dagiti kameng ti PDEA-Cordillera iti search warrant iti maysa a billiard hall sadiay West Buyagan, La Trinidad, Benguet idi parbangon ti Lunes, August 3.

Nabigbig dagiti nakemmeg a da Ericson Valle, 31-anyos ken Myrick Cadap, 26-anyos, agpada a residente ti Poblacion, Buguias, Benguet; ni Reagan Agayao, 31-y/o, residente ti Amlimay, Buguias, Benguet ken ni Brenson Soriano, 25-anyos, residente ti Gambang, Bakun, Benguet.

Impaulog ni Presiding Judge Jennifer Humiding ti Regional Trial Court, First Judicial Region, Branch 63, La Trinidad, Benguet ti search warrant gapu iti panaglabsing ti agtagikua iti billiard hall iti RA 9165 wenno iti Comprehensive Dangerous Drugs Act of 2002.

Puntirya ti search warrant da Ericson Valle ken Ibalson Kadangen ngem kabayatan ti operasyon ket nakemmeg dagiti tallo pay a kadwa ni Valle bayat nga awan iti nasao a panawen ni Kadangen.

Kabayatan ti operasyon, nakumpiskar kadagiti suspek ti 12 a pakete ti mapapati a shabu ken nagduduma a drug paraphernalia, pakairamanan ti maysa a tooter a naglaon ti maatap a narunaw a shabu, no sadino, nakasaganan dagitoy para iti maysa a drug session.

-- ADVERTISEMENT --

Karaman kadagiti nakumpiskar a maatap a shabu ti dua a pakete a naala iti lining ti jacket ni Agayao ken ti innem a pakete a naikabil iti maysa a pouch a nabirukan iti uneg ti videoke machine.

Naamuan nga agserserbi a drug den ti nasao a billiard hall bayat a nagkedked dagiti uppat a mangipaay iti komento dagitoy. (Bombo Razced Pagoli)