BAGUIO CITY – Natiliw ti tallo a drug personalities iti nagsina a buy-bust operation nga insayangkat dagiti otoridad ditoy siudad ti Baguio itay laeng nabiit.
Immuna a natiliw iti operasyon sadiay Monday Drive Street, Guisad Central Barangay da Francis Gustarde, 31-anyos ken Edmond Genese, 22-anyos, agpada a tubo ti Pangasinan ken residente ti Baguio City.
Naamuan a ni Gustarde ket naisubli iti listaan kas High Value Target ita a tawen bayat a ni Genese ket naisubli iti listaan kas High Value Individual a karaman iti Regional Top Ten Illegal Drugs Personalities.
Nakumpiskar kadagitoy ti tallo a pakete ti maatap a shabu nga agdagsen ti agarup nasurok 1.3 grams ken narekober iti ikotda ti naaramat a buy-bust money.
Maibasar iti report ti pulisya, naipasidong iti panagwanawan ni Genese gaputa sigud daytoy a nakasuan ken nakumbiktar gapu iti panaglabsing iti linteg kontra iti iligal a droga idi 2016 bayat a naipasidong iti panagwanawan ni Gustarde idi 2019 idi nakaruar iti pagbaludan ni Genese ken masansan ti panagkadkadwa dagitoy.
Kabayatanna, natiliw met iti operasyon sadiay Dr. Cariño, Upper QM ti High Value Individual a nabigbig a ni Carl Resurrection alyas Dino, 21-anyos, construction worker, tubo ti Norzagaray, Bulacan ken residente ti Apugan, Irisan, Baguio City.
Nakumpiskar kenkuana ti maysa a pakete ti maatap a shabu nga agdagsen ti agarup nasurok maysa a gramo ken ti cellphone nga inaramatna iti transaksionda iti operatiba.
Narekober pay iti ikotna ti naaramat a buy-bust money.
Maibasar iti report ti pulisya, siguden a natiliw ni Resurrection gapu iti transaksion ti iligal a droga ken naipasidong iti probation.
Nupay kasta, intuloyna latta dagiti aktibidadna iti iligal a droga.
Gapu iti panakatiliw dagitoy ket sumangoda iti kaso a panaglabsing iti Comprehensive Dangerous Drugs Act of 2002.
