-- ADVERTISEMENT --
Courtesty PIO | BAGUIO

BAGUIO CITY – Posible a maisayangkat ditoy Baguio ti 24/7 a panagbakuna wenno ti agingga iti tengngat rabii a panagbakuna kontra iti COVID-19.

Iti interview ti Bombo Radyo Baguio, kinuna ni City Administrator Engr. Bonifacio Dela Peña a mabalin a maaramid ti nasao a sistema ti panagbakuna no adda ti tumaod a pagkasapulan.

Nupay kasta, dinakamatna nga agdepende latta daytoy iti kaadda ti bakuna a maawat ti siudad nangruna ta saan met a mamingpinsan a maipatulod ditoy siudad ti 380,000 a doses ti bakuna kontra iti COVID-19 a ginatang ti lokal a gobyerno.

Iti baet daytoy, impasiguradona a nakasagana dagiti vaccination team ti siudad nga agserbi iti at-attidog nga aldaw nangruna ita a pagbalbalinenda a pito nga aldaw wenno linawas ti panagbakuna manipud iti sigud a tallo agingga uppat nga aldaw laeng.

ni City Administrator Engr. Bonifacio Dela Peña

Dinakamat pay ni Engr. Dela Peña nga insimpadan ti proseso iti panagpabakuna tapnu umababa ti oras a panag-uray ken panagpila dagiti agpabakuna ken agbalin laengen a 15-20 a minutos manipud iti interview agingga iti panakaitudok ti bakuna.

-- ADVERTISEMENT --

Innayonna a kiskissayanda ti kapasidad ti vaccination site iti UB gym ken naynayonanda ti kapasidad dagiti vaccination sites iti SM, SLU gym ken iti Baguio Country Club.

Kiniddawna metlaeng ti dagus a panakaiyuman kenkuana dagiti reklamo wenno maobserbaran a panagkurang kadagiti vaccination sites tapnu dagus a maaksionan wenno maisimpa ti pakaseknan.