photo | Tuba MPS

BAGUIO CITY – Malamlamayan ita ti dua a senior citizen bayat nga agpapaimbag paylaeng iti pagagasan ti maysa kadagiti tallo a senior citizen a nadangran iti panakatnag iti rangkis ti naglugananda nga FX sadiay Tuba, Benguet idi kalman.

Nabigbig dagiti pimmusay a da Aida Dontogan, 73-anyos ken Mely Bayacsan, 70-anyos bayat a nabigbig dagiti nadangran a da Rosa Ditchi, 75-anyos; Lucia Lestino, 72-anyos ken Joselito Solley, 70-anyos.

Maibasar iti inisyal nga imbestigasyon, nagtaud ti FX nga imanmaneho ni Aloy Atiw sadiay Sitio Lubas, Barangay Ansagan ken paturongda sadiay Sitio Lasong a pagnanaedan dagitoy.

-- Advertisement --

Apaman a nakasangpetda iti pasang-at a paset ti kalsada, napaay ti lugan a naka-abante a nagresulta iti panagatras daytoy ken saan pay a nakontrol ti driver ti manibela.

Gapu iti daytoy, nagkillo ti lugan agingga a natnag iti rangkis nga addaan kauneg nga agarup nasurok 50 a metro.

Dagus a pimmusay ni Dontogan bayat a pimmusay ni Bayacsan bayat a maitartaray iti ospital.

Agtaltalinaed met iti pagagasan ni Ditchi gapu iti nasagrapna a dunor iti ulo ken kanawan nga ima bayat a nakaruaren da Lestino ken Solley.

Saan met a nadangran ti maysa pay a pasahero a ni Larry Martin gaputa limmagto paruar iti lugan idi nadlawna a maaksidente dagitoy.

Iti agdama, addan iti kustodiya ti pulisya ti driver a nagsagrap ti minor injury bayat a maur-uray ti agbalin a desisyon ti pamilya dagiti biktima.