BAGUIO CITY – Natiliw ti innem a drug suspects, pakairamanan ti dua a Cordillerans iti buy-bust operation a naisayangkat sadiay San Francisco, Concepcion, Tarlac idi kanikadua a nakakumpiskaran ti nasurok P19-M a gatad dagiti marijuana bricks.

Nabigbig dagiti dua a da Marlon Miranda, 34-anyos, nakalista a high-value target ken Joey Palaeyan, 33-anyos, agpada a residente ti Bulanao, Tabuk, Kalinga no sadino, dagitoy ti target ti buy-bust operation.

Maibasar iti report ti PNP, naisayangkat ti joint anti-illegal drug operations kontra kada Miranda ken Palaeyan a nangilako ti 25 a marijuana bricks iti operatiba bayat a natiliw dagiti uppat pay a suspek kabayatan ti panakitransaksionda kadagiti dua.

-- Advertisement --

Naamuan a kalpasan a natiliw dagiti suspek ket ininspeksion dagiti otoridad ti inaramatda a lugan ken sadiay a nakita dagiti kanayonan a marijuana bricks.

Naduktalan iti imbestigasyon nga aktibo dagiti suspek iti panagilako ti iligal a droga, partikular ti marijuana sadiay Ilocos Region ken Central Luzon.