-- ADVERTISEMENT --

BAGUIO CITY – Nakemmeg ti dua a drug suspects iti nagsina nga operasyon dagiti otoridad ditoy siudad ti Baguio idi kalman.

Nakemmeg ti vendor a ni Romelo Alberto Bero, 40-anyos sadiay Badihoy St., Guisad, Baguio City.

Nagturong dagiti pulis iti pagtaengan ti suspek tapno makemmeg daytoy gapu iti kaso a kidnapping kalpasan ti maatap a panangilemmengna iti anakna.

Kabayatan ti operasyon ket kinapkapan dagiti pulis ti suspek ken ditoy a naduktalan ti kaadda dagiti maatap a shabu iti bulsa ti suspek.

Nakumpiskar ti 12 a pakete ti mapapati a shabu, maysa a pouch ken tallo a pidaso ti foil strip.

-- ADVERTISEMENT --

Sumangsango ita ni Bero iti kaso a kidnapping ken panaglabsing iti RA 9165 wenno ti Comprehensive Dangerous Drugs Act of 2002.

Kabayatanna, nakemmeg met laeng ni Jefferson Gay, 20-anyos sadiay Bakakeng Norte, Baguio City babaen iti buy-bust operation nga insayangkat ti PDEA.

Nakumpiskar manipud iti suspek ti 3 a pakete ti mapapati a shabu ken ti naaramat a buy-bust money.

Sumangsango metten ti suspek iti panaglabsing iti RA 9165 wenno ti Comprehensive Dangerous Drugs Act of 2002.