BAGUIO CITY – Natiliw ti dua a babai a drug personalities iti buy-bust operation nga insayangkat dagiti otoridad sadiay Purok 1, Dontogan, Marcos Highway, Baguio City idi Miyerkoles, July 21, 2021.

Nabigbig dagitoy a da Azhel Pablo Salvador alyas Esang, 19-anyos, residente ti Malate, Manila, nakalista a High Value Invidividual ken Regional Top 10 Drug Personality ken ni Angeline Mae Dominguez Delena, 19-anyos, residente ti Obesis Street, Pandacan, Manila, nakalista nga Street Level Individual.

-- Advertisement --

Maibasar iti report, inlako dagiti dua iti nakatransaksionda nga operatiba ti maysa a cellophane a naikabil iti nalabbaga a chinese paper envelope a naglaon ti maatap a shabu nga agdagsen ti agarup nasurok 25 a gramos ken aggatad ti P170,000.

Naisayangkat ti operasyon kontra kada Salvador ken Delena manipud iti impormasyon a naawatda nga ar-aramaten ni Alexander Serrano ti anakna a ni alyas Esang kas courier ti shabu.

Naamuan a ni Alexander Serrano ket nakabalud ita sadiay National Bilibid Prison.

Naamuan pay a ti balud ti nakitransaksion kadagiti operatiba ditoy Baguio ken nagbayad ti lugan a mangitulod iti anakna ken iti iligal a droga.

Iti agdama, sumango da Salvador ken Delena iti kaso a panaglabsing iti Comprehensive Dangerous Drugs Act of 2002.