Nagpalab-ot sang bulig ang Ceres Negros Football Club sa organizing team sang Southeast Asian Games football tournament.

Ini ang kasunod sang reklamo sang pila ka mga international football teams nga madugay ang paghulat nila sa airport sang transportation service kag ang pag-ginutok nila sa e-jeep.

Sa interview sang Bombo Radyo Bacolod kay Ceres Negros-FC administrator Nicholas Golez, naghatag sang 18 ka mga bus ang Vallacar Transit Incorporated agud magamit sang mga teams nga transportasyon.

11 sa mga bus ang ginagamit sang men’s team, anom ang iya ka women’s team kag may isa naman ka spare bus in case of emergency.

Suno kay Golez, gilayon nila nga gin-asikaso ang mga permit sa Land Transportation Franchising and Regulatory Board (LTFRB).

Dugang pa sini, matapos mahibaluan ang problema sa transportasyon sang mga football teams, gilayon nga nagpasugot si Yanson Group of Bus Companies president kag chief executive officer Leo Rey Yanson nga maghatag sang libre nga serbisyo.

Nahibaluan nga si LRY man ang nagapanag-iya sang Ceres Negros-FC nga isa sa mga top football club sa pungsod.

Ang 18 ka mga Ceres bus nga naka-base sa Batangas ang pagagamiton tubtob sa Disyembre 11.