Tatlo ka mga persona ang arestado sa magkatuhay nga drug buybust operation nga ginpatigayon sa syudad sang Bacolod.

Ginkilala ang suspetsado nga sanday John Paul Jovero, 35 anyos kag residente sang Purok Star Apple 2, Barangay 27, Bacolod City; kag Adrian Dela Peña, 39 anyos kag residente sang Barangay 19, Bacolod City.

Nakuha sa paghinakop sang mga ini ang P500 bill, tatlo ka heat sealed transparent sachet sang suspected shabu kalakip na ang buybust item, iban nga drug paraphernalia kag P200 bilang cash proceeds.

Ginabanta nagabug-at sang 1 gram ang nakuha nga suspected shabu kag nagabalor sang P6,800.

Nakahunong na sa karun ang mga ini sa Bacolod City Police Station 6.

Samtang dakop man ang isa ka persona sa buybust operation sa Purok Amalis, Barangay 40, Bacolod City.

Ginkilala ang suspetsado kay Jonathan Francisco, 32 anyos kag residente sang Purok Puntebella, Barangay Taculing, Bacolod City.

Nakuha sa paghinakop sini ang tatlo ka suspected shabu kag ginabanta nagabug-at sang isa ka gramo kag nagabalor sang P2,000.

Nakahunong na sa karun ang mga ini sa Bacolod City Police Station 2 kag lunsay natalana nga pasakaan sang kaso sa paglapas sa RA 9165 ukon Comprehensive Dangerous Drugs Act of 2002.