Nakapauli na sa syudad sang Sagay ang tatlo ka mga mangingisda nga nastranded sa Cauayan, Masbate matapos nga magpanagat antes pa ang pagsulod ni Bagyong Jolina apang bangud sa mabaskog ang current sang tubig, nautod ang tarik sang sakayan sang mga ini kag gin-anod.

Ang mga nastranded ang ginkilala kanday Totong Meya, 49 anyos; Saldy Barbadillo, 49 anyos, kag Ronaldo Devibar, 30 anyos kag lunsay mga residente sang Sitio Suyac island, Brgy Taba-ao, Sagay City, Negros Occidental.

Sa interview sang Bombo Radyo kay Captain Ludovico Librilla, commander sang Philippine Coast Guard Station-Negros Occidental, nakaabot na kahapon sa syudad sang Sagay ang mga nastranded nga mangingisda.

Gin-interview man ang mga ini sang coast guard personnel sang naghapit sa sub-station sang coast guard sa Sagay.

Safe and sound man ang mga ini sang pag-abot sa syudad sang Sagay.