Nakabaton sang pasidungog ang pila ka mga local government unit (LGU) sa Negros Occidental sa una nga adlaw sang pagselebrar sang 20th Provincial Tourism Week nga may tema “Tourism Building Peace, Fostering Knowledge”.

Sa interview sang Bombo Radyo kay Provincial Tourism Officer Jennylind Cordero, Setyembre 22 tubtob Setyembre 27 ang nasambit nga selebrasyon kag sang Martes, ila ini ginsugudan paagi sa pagpanghatag sang mga award sa mga LGUs subong man mga tourism officers.

Apang bangud sa COVID-19 pandemic, ginpatigayon ang selebrasyon kag awarding virtually.

Nakabaton sang Best Tourism Officer nga award sanday Helen Argueles Covillar sang ciudad sang Sagay kag Amy Rose Lavela sang banwa sa Calatrava bangud sa ila nga kontribusyon kag serbisyo sa turismo sang probinsya.

Nagapanguna naman ang ciudad sang Sipalay sa Best Tourism office, ginsundan ini sang Cadiz City kag ikatatlo ang San Carlos City.

Nakakuha man sang first place sa Best Tourism Marketing Video ang Sipalay, 2nd place ang Don Salvador Benedicto kag 3rd place ang banwa sang Murcia.

Nakabaton naman sang consolation price sa nasambit nga category ang Bago City; Kabankalan City; La Carlota City; San Carlos City; kag banwa sang Candoni.

Samtang nalakip sa Top 10 contributor on tourism statistics ang banwa sang Hinobaan, ciudad sang Sagay, Bago, La Carlota, Talisay, San Enrique, Cadiz, Kabankalan, San Carlos kag Sipalay.

Nakabaton man sang pasidungog ang mga LGU nga prompt ukon timprano pa nga nagasumbit sang data sa Provincial Tourism Office nga ginalakipan sang mga ciudad sang Bago, Cadiz, La Carlota, Sagay kag Talisay.

Suno kay Cordero, nagakadapat lang nga irecognize man ang mga LGUs kag mga naga-ubra sa turismo bangud ang Negros Occidental ang ikaduha sa Western Visayas in terms of tourism samtang ika-12 naman ini sa masobra 60 ka mga probinsya sa bilog nga Pilipinas.