Napaslawan ang Philippine Azkals sa ila kampanya batok sa Syria sa second round joint qualifier sang FIFA World Cup Qatar 2022 kag AFC Asian Cup China 2023 sa Panaad Park and Stadium sa Brgy. Mansilingan, ciudad sang Bacolod kagab-i.

Apisar una nga nakapasulod para sa Pilipinas si Javier Patiño sa ika-20 minutos sang hampang, gin-demolish ang mga ini sang mga Syrians sa pagtapos sang game sa score nga 2-5 pabor sa pangayaw.

Matapos ang goal ni Patiño, nagbalos ang mga Syrians pinaagi sa goal nanday Omar Alsoma sa ika-21 nga minutos sang game nga ginsundan ni Khaleb Almbayer sa ika-30 kag Firas Alkhatib sa 48:45.

Pagsulod sang second half liwat nga naka-goal si Alsoma sa 55:44 mark samtang nakabalos ang Azkals sa goal ni Mike Ott sa ika-83:39 apang duha ka minutos lang ang nakaligad, nagpasulod naman si Mahmoud Al Mawas nga amo na ang nagselyo sang ila kadalag-an.

Nagdangat naman sa 2,645 attendance sa Panaad Park and Stadium kagab-i.

Ang resulta sang match kagab-i ang nagdala sa Syria sa pinakamataas nga pwesto sang Group A pinaagi sa goal difference, samtang nagsarurot naman ang Pilipinas sa pinakamanubo nga pwesto.

Sunod naman nga atubangon sang Azkals ang Guam sa Martes, Setyembre 10.