Ginpaathag sang pinuno sang Provincial Environment and Natural Resources Office (PENRO) sang Negros Occidental nga ginadumilian ang pagkuha sang tanum nga badyang sa mga lasang kag kun madakpan, magapangatubang sang nagakaigo nga sanction.

Sa interview sang Bombo Radyo kay PENRO Head Edgardo Rostata, ginpahayag sini nga ginadumilian ang pagpanguha sang badyang sa lasang santo sa Republic Act 9147 ukon “An Act Providing For The Conservation And Protection Of Wildlife Resources And Their Habitats, Appropriating Funds Therefor And For Other Purposes”.

Suno kay Rostata, ang badyang ang ginakabig nga wild nga species sang tanom kag may yara ini sang role sa environment.

Suno diri, makabulig ini sa pagprotekta sang mga sapat bangud sa malapad kag mataas sini nga mga dahon.

Nagabulig man ini sa pagpugong sang soil erosion sa mga bukid kun mag-ulan.

Gindugang man sini nga ginagamit ang wild nga tanum sa India kag Vietnam bilang bulong ukon pag-ubra sang pila ka mga produkto.

Gani nag-abiso ini sa mga luyag magtanom sang badyang nga sarang sila maka-apply para sa registration sa Department of Trade and Industry (DTI) ukon Department of Environment and Natural Resources (DENR) bangud ini ang mangin basehan agud mahatagan sila sang permit agud ibaligya ang nasambit nga tanom.