Nagapanawagan ang Cadiz City Fire Station sa pamilya sang helper sang nasunog nga truck sa nasambit nga ciudad nga padulungan ang bangkay sang biktima sa punerarya agud nga mahibaluan ang identity sini.

Ang biktima ang ginkilala lamang kay Romnick, nga halos indi na makilala matapos masunog ang ila nga canter truck sa national highway nga sakop sang Barangay Luna kahapon sang kaagahon samtang nasunog naman ang dapa-dapa sang driver nga si John Vincent Recto, 25-anyos, residente sang Sagay City.

Sa interview sang Bombo Radyo kay Fire Officer 1 Gerald Bugtong, arson investigator sang Cadiz City Fire Station, wala pa mahibaluan kun may kompaniya ang nasunog nga canter truck.

Suno diri, wala man sang nagpadulong nga pamilya agud magpamangkutan sang matuod nga identity sang biktima bangud wala man sang ID nga nakuha diri kag wala man sang lisensya ang driver sang truck.

Antes nasunog ang truck, nagakarga ini sang indi magnubo isa ka gatos ka gallon sang gasolina nga pagadal-on kuntani sa Molocaboc Island, Sagay City.