Ginpaklaro ni Bacolod City Lone District Congressman Greg Gasataya sa Department of Education kun makaupod ang pribado nga mga eskwelahan sa postponement sang pagbukas sang klase sa Oktubre 5.

Suno kay Congressman Greg Gasataya, nagpamangkot ini sa chairman sang committee on Basic Education sa House of Representatives angot sa mga pribado nga eskwelahan nga nakasugod na sang klase.

photo from web
photo from web

Suno kay Gasataya, ginhatagan sang otoridad sang DepEd ang mga pribado nga eskwelahan nga magdihon sang kaugalingon nga academic calendar.

Nagtawag man ini sa pila ka mga opisyales sang DepEd kag ginahingyo nga ipaklaro kay DepEd Secretary Leonor Briones kun makaupod gid man ang pribado nga eskwelahan sa postponement tubtob sa Oktubre 5.

Nahibaluan nga may pila ka mga pribado nga mga eskwelahan sa ciudad sang Bacolod nga nakahanda na nga magbukas sang klase samtang ginapatuman ang no face-to-face classes.

Luyag ni Gasataya mahibaluan ang pagpaathag sang DepEd bangod madamo naman sang mga ginikanan nga may mga kabataan nga naga-eskwela sa pribado nga buluthuan ang nagapamangkot.

Ang Commission on Higher Education (CHED) ang may kasubong man nga puder sa pagpatuman sang kaugalingon nga School Calendar.

Suno kay sa kongresista, magapangayo man ini sang paathag nagikan sa CHED kun maga-upod ang mga ini sa ipatuman nga postponement sang klase.