Gin-athag sang provincial agriculturist sang Negros Occidental nga indi pwede masuspend ang pag-issue sang Bureau of Plant Industry sang rice importation permits kun harvest season.

Nahibaluan nga ginpasipalahan ni Sen. Cynthia Villar sa Senate agriculture committee hearing si Bureau of Plant Industry director George Culaste bangud nga nagahatag ini sang rice importation permits bisan harvest season kun sa diin suno sa senador mas nagapagamay sa income sang mga nagapiyait nga mga mangunguma.

Sa idalom sang Rice Tariffication Law, ang BPI nga isa ka attached agency sang Department of Agriculture ang naga-issue sang sanitary and phytosanitary import clearance nga required sa mga rice traders antes sila maka-import.

Suno kay Villar, dapat nga kaayuhon ni Culaste ang iya trabaho bangud ang nagakatabo karon ang daw kaangay nga indi niya deserve ang iya nga obra.

Samtang, gin-athag ni Provincial Agriculturist Japhet Masculino nga nakasaad sa layi nga kun kumpleto ang papeles sang importer, dapat mahatagan na ini sang clearance.

Kun sa sulod sang pito ka adlaw nga indi ini mahatagan sang clearance, nagakahulugan na ini nga good as approve.

Indi man pwede suno kay Masculino nga indi mag-issue si Culaste bangud nga liable ini sa idalom sang layi.

Dugang pa sang provincial agriculturist nga kuntani ginbutang sang mga mamalidha sa idalom sang Rice Tariffication Law nga isuspend ang importation kun harvest season agud maprotektahan ang mga mangunguma.