Nagapasalamat si Mayor Evelio “Bing” Leonardia sa ordinansa nga ginpasar sa Sangguniang Panglungsod tuhoy sa mandatory nga pagsuksok sang face mask kag face shield sa mga public utility jeepneys, merkado kag mga enclosed work places.

Sa session sang SP kahapon, ginpasar sa third and final reading ang nasambit nga ordinansa nga gin-author ni Councilor Archie Baribar.

Sa interview snag Bombo Radyo kay Leonardia, dako gid ang mabulig sang pagpatuman sang ini nga protocol agud malikawan ang paglapta sang virus.

Ginakalipay man sang alkalde nga madamo ang nagacomply na sini apisar nga wala pa sang resolusyon.

Ginapasalamatan man sini ang SP sa mga inisyatibo bangud suno sa iya, madamo na ini sang nabuhat nga executive order para sa temporaryo nga mga pagpatuman gani mas maayo nga gin-institutionalize na lang.

Nagpanawagan man ini sa mga nagapalapta sang fake news sa social media nga untaton na ang pagpamulitika kag indi paghampangan ang kabuhi sang pumuluyo bangud indi lahog-lahog ang COVID-19.